MARIEL NAGLUTO PARA SA MGA BINAHA

                         

Masuwerte ang mga kapatid nating Muslim na nasalanta rin ng baha ng ulang habagat dahil kaagad silang sinaklolohan ng mag-asawang Robin Padilla at Mariel Rodriguez.

Simula raw no’ng bagyong Gener ay naka-monitor na si Robin at naga-abot nan g tulong pero nu’ng tuluy-tuloy na ang ulan pagkaalis ng bagyo ay dito na nagi-ikot ang aktor sa village nila kasama ang asawang si Mariel at nakitang maraming binahang kapitbahay kaya hinikayat niyang doon muna sa gym niya sa bahay tumuloy.

Hindi na humingo ng tulong ang aktor sa gobyerno dahil ayaw na niyang maka-istorbo pa at mas maraming kababayan tayong mas dapat bigyan ng atensyon ng mga kinauukulan.

Sa sariling bulsa ni Robin nanggaling ang mga ipinambili ng gamot, pagkain, bigas, kumot at ibang pangangailangan at malaking tulong daw na nagpadala ang mga produktong ini-endorso niya tulad ng 555 Tuna sardines, noodles, nutrigo at Skyflakes.

Bukod dito ay dinala rin ni Robin ang ilang elderly people sa Westview Clinic Hospital sa may Fairview dahil sa hindi malamang sakit na pabalik-balik.

  

Ayon pa sa kuwento ni Mariel, “nabalitaan namin na may Mosque na wipe-out kaya super rush kami (2AM)  Bibigyan namin ng hot food na ako ang nagluto.”

Sa ilang araw na hindi huminto ang ulan ay halos tig dalawang (2) oras lang parati ang tulog nina Robin at Mariel dahil sa kamo-monitor sa mga nabaha at buong araw silang nag-pack kasama ang mga kapatid na Muslim ng aktor para naman daw sa mga kapitbahay nila sa Fairview bukod pa sa mga nakikituloy ngayon sa Liwanag ng Kapayapaan Foundation dahil wala ng mauwian.

  

Samantala, anak-mayaman si Mariel, pero nae-enjoy niya ang ganitong buhay at mas nakakaramdam daw siya ng kasiyahan kapag may mga napapangiti silang kababayan.

  

“It’s my birthday (August 10) today Reggs, at ito na ang handa ko, at ito ang gusto ko talaga.” Kuwento ng TV host/

Matatandaang ganito rin halos ang nangyari noong nakaraang taon kina Mariel at Robin na dinalaw nila ang mga kapatid sa Mindanao (Iligan at Cagayan de Oro) na nasalanta rin ng bagyong Sendong na halos winalis ang mga lalawigang nabanggit.

Ang isang milyong naitabi ni Mariel para ipang-down sana sa kotseng bibilhin niya ay ipinambili niya ng mga kailangan ng mga biktima ng Sendong bukod pa sa namigay din sila ng tulong pinansiyal sa mga ito.

Masuwerte rin si Robin sa pagkakaroon ng asawang tulad ni Mariel dahil naglalabas din ito ng sarili niyang pera bukod pa sa kaagapay niya sa lahat ng ginagawa niya.

“I love Robin Reggs, alam mo naman ‘yan, di ba?  At lahat gagawin ko para mapasaya siya parati and masuwerte rin ako because Robin has a big heart, hindi siya maramot na tao kaya sobra ko siyang mahal.” Paulit-ulit na sabi ni Mariel sa amin.