AGA, MARAMING MAGAGANDANG PLANO SA SAN JOSE, CAMARINES SUR

Pormal ng sumumpa bilang bagong miyembro ng Liberal Party si Aga Muhlach kay DOTC Secretary Mar Roxas na siya ring president sa nasabing partido noong Biyernes ng gabi August 3.

Ginanap ang panunumpa ni Aga sa LP Headquarters, Araneta Center, Cubao, Quezon City at saksi naman sina Oriental Mindoro Governor Boy Umali, DILG Secretary Jesse Robredo, Bureau of Custom Secretary Ruffy Biazon, Deputy speaker Congressman Erin Tanada, at LP Secretary General Jun Abaya.

Sinuportahan naman si Aga ng asawang si Charlene Gonzales-Muhlach at anak kay Janice de Belen na si Luigi (Igi Boy), kaibigan sa showbiz na sina Bayani Agbayani, Cesar Montano at direktor niyang si Joyce Bernal at manager niyang si Manay Ethel Ramos at ilang kaibigang hindi taga-showbiz.

 Bakas kay Aga ang saya sa ginanap na panunumpa dahil sa rami ng sumuporta sa kanya at pakiramdam nga raw niya ay panalo na siya sa magandang feedback din na nakuha niya mula rin sa mga kababayan niya sa Camarines Sur kung saan kakandidato siya bilang kongresman sa ika-apat na distrito sa 2013 elections.

Hindi naging madali para kay Aga ang desisyong pasukin ang pulitika dahil limang taon niya itong pinag-isipan at iminungkahi rin niya ito sa asawang si Charlene at sa pamilya Muhlach na nagpakita naman ng suporta sa kanya.

“Matagal ko ng plano talaga, gusto kong bumalik sa desire ko to help them (kababayan sa Camarines Sur) and make an impact talaga sa district namin.” Bungad ni Aga ng maka-tsikahan namin sa nasabing okasyon.

Ayon kay Aga ay mahilig siyang mag-develop ng mga lugar tulad ng ipinatayo niyang bahay bakasyunan sa Mataas na kahoy sa Batangas kung saan nagpagawa siya ng sariling daan patungo rito dahil nga isa itong liblib na lugar.

At ganito rin ang gusto niyang gawin sa mahirap na bayan ng Goa, Camarines Sur, “I want to develop also tourism there, like Camsur na dinibelop ni El Rey (Governor Rey Villafuerte).

“So kung na-develop na at pupuntahan ng mga turista ang bayan namin (Goa), sino ba ang makikinabang no’n.  Kaya lahat ng hanapbuhay na hinahanap nila, nandoon na hindi na nila kailangang hanapin pa, sila mismo ang magde-develop ng lugar namin.

“Tulad halimbawa na nasa Caramoan ka, at nag-aaral ka, ilang oras ang biyahe, tatlong oras? Paano ka pa mag-aaral?  So, kung lalagyan mo ng eskuwelahan ang bawa’t lugar, halos lahat makakapasok, kaya I will try my best na gawin lahat ‘yun, kung mananalo ako.

“May funds talaga ang government para diyan, may budget para sa education, tourism, agriculture. Lahat ng perang ‘yun, ibagsak mo lang lahat para do’n, yun lang ‘yun, then it becomes dirty, once it being corrupt, then it becomes scary.

“At puwede kong gawin lahat ‘yun (gamitin ang pera sa projects) at wala akong dapat katakutan.”

“Politicians will always say na, ‘ako ito ang gagawin ko, ito gagawin niya’ pag-upo, hindi naman natupad lahat ‘yun, so ako, kung mananalo, lahat ng ipinangako ng ilang taong (nangako), itutuloy ko.  Ilang henerasyon na ang nangako, itutuloy ko.

“Madali lang naman kasi may budget para roon, ang mahirap, paano ako mananalo kaya dapat ipakilala ko ang sarili ko sa mga tagaroon.” Mahabang paliwanag ng aktor

  

Hindi raw siya tubong Camarines Sur kaya paano siya iboboto ng mga tagaroon.

“First, my family is really from Partido, taga-Goa kami. My lola is from there, my dad.

“Parang lahat ng kamag-anak ko doon, nakilala ko na, ‘yung mga Amador, Go, Borja, Romero, Abundabar, Calleja. I have a house there, matagal na.

At sa tanong naming mas maraming intriga/magulo sa pulitika kaysa sa showbiz.

“Maraming nagsasabi sa akin na magulo sa pulitika. Pero naisip ko rin, marumi ang pulitika kapag marumi ang tao. Magulo ang pulitika kung makikigulo ka.

“At saka, okey naman ako. Okey naman ang pamilya ko. Meron na rin naman akong naipon. Hindi ko gagawin na hanapbuhay ang pulitika sabi ko nga, ibibigay ko sa tao kung ano ang dapat.

“Kung ano ang meron ako ngayon, pinaghirapan ko. Sa buong buhay ko, walang makapagsasabi na nanlamang ako, nanulot ako, nandaya o nagnanakaw ako sa kahit kanino. Hinding-hindi ko makakaya na gumawa ng ganyan.”pagmamalaki ni Aga sa naabot niya sa showbiz at sa kinalalagyan niya ngayon.

“Still learning” ang napangiting sagot ni Aga sa tanong kung marunong siyang magsalita ng bikolano. Pag tumutulong ka naman, hindi mo naman kailangang magsalita ng bikol, mas maganda ‘yung ginagawa kaysa ‘yung daldal ka lang ng daldal.” Dagdag pa.

At ang nakakatuwang kuwento ng aktor ay tungkol sa kambal nilang sina Atasha at Andres na sobrang saya raw kapag nasa San Jose (bayan ng Camarines Sur) sila dahil, “nakakagala sila, nakikipaglaro sila sa mga bata roon na hindi nila nagagawa rito.

“Umaalis sila ng bahay, umaga palang, dumarating gabi na at may mga libag sa leeg, normal na bata, naalala ko nu’ng bata ako naglalaro ako noon sa Mandaluyong, ganu’n ako, puro dumi ang leeg. 

“Nalibot na nga nila ang buong plaza, tuwang-tuwa sila, at magaling silang magsalita ng bikol, kaysa sa amin ni Charlene.” Masayang kuwento ng aktor.

At base rin sa paglilibot ni Aga ay nakita niya na mahal siya ng mga tao base rin sa yakap at hawak ng mahigpit sa kanya na sinasabing, ‘ikaw ang pag-asa ng bayan ng San Jose’. 

Kaya hindi masisi ang aktor kung mas lalong lumakas ang loob niyang kumandidato sa nasabing bayan para tulungan sila.